Cerita Bahasa Jawa : Keris Naga Ijo (cerpen/cerkak)

KERIS NAGA IJO

Kocap kacarita nalika dewa-dewa isih seneng mudhun menyang donya saka kahyangan. Nalika iku kraton Mataram lagi diserang saka wilayah sakiwa tengene. Wargane padha bingung golek panggonan kanggo ngungsi, padha wae karo para dewa wektu iku, dewa uga ngungsi ing sawijining panggonan, ana ing sakiwa tengene gunung Merapi. Gunung Merapi isih ayem tentrem, dipayungi ing pedhut putih.

Ing panggonan liya, ing gunung Merapi uga, wektu iku ana bocah lanang sing lair saka titisane dewa. Raine bagus, regeman tangan lan tendangan sikile rosa banget. Ora kaya bocah liya umume, bocah iku diarani Tangguh.

Ing kraton liya sing adoh, wektu iku uga lair bocah wadon. Raine ayu lan elok. Bocah iku sing paling ayu ana ing kraton kono. Kulite padhang, uga nandakake jiwa sing suci, mula bayi iku diarani Surya Suci.

Ing sawijining dina Surya Suci ketemu priya ing taman Wadari. Surya Suci kepincut karo priya sing gagah prakosa. Surya Suci dilamar dening Jaduna sing sekti, kuat, lan misuwur ala budi pakartine. Surya Suci misuwur alus atine mula ora wani nulak panglamare priya sekti iku. Mula Surya Suci njaluk supaya Jaduna golek keris Naga Ijo.

Ana ing kraton Darana, Jaduna ketemu karo Dara, sing ngerti anane keris Naga Ijo sing dikarepake Jaduna. Keris iku duwekke bocah lanang sing lair saka titisane dewa. Jaduna akon Dara supaya goleki keris Naga Ijo. Nanging Dara ora gelem, banjur Jaduna mateni Dara, sabanjure lunga menyang gua Sorong.

Crita patine  Dara uwis sumebar tekan Surya Suci, mula Surya Suci akon Tangguh supaya mateni Jaduna. Tangguh enggal budhal menyang gua Sorong. Jaduna kaget amarga Tangguh nggawa keris Naga Ijo ing tangane. Dadi paprangan rame. Jaduna lena, Tangguh bisa nancepake kerise ing dhadhane Jaduna. Jaduna malih dadi watu. Nanging esuke Jaduna  bisa malih maneh dadi manungsa. Jaduna mlayu saka gua sorong.

Para dewa nemoni Tangguh lan mratelakake menawa Jaduna wis malih maneh dadi manungsa lan luwih kuat. Jaduna mateni kabeh wong sing ditemoni ing sadalan-dalan. Kabeh wong sing isih urip golek panggonan kanggo ngungsi.

Kabar iku dirungu dening Tangguh lan dheweke banjur nggoleki Jaduna. Jaduna ketemu ing kratone Surya Suci. Jaduna lan Tangguh perang in plataran. Kekarone padha kekuatanne, mula anggone perang tekan esuk. Para dewa padha murka marang Jaduna. Jaduna klakon dipateni nganggo geni sing panas banget.

Tangguh nglamar Surya Suci, panglamare ditampa lan bisa urip mulya.